سننسى....
وسننسى
سنمد يدينا للقاتل
وسنطلب سلماً
لا بأس إن قتل أخانا
أو قتل أمنا وأبانا
سنعود وننسى
سنقبل يده
وسنطلب سلماً
أحببنا عيش الذل
وعشقنا أنات الجرحى
ولعقنا دمعات الثكلى
ونعود ونطلب سلماً
لا نملك غير السلم
لا نملك
لا نملك حتى الشجب
لا نملك غير إدانة كل شهيد
وسنقتل
سنقتل كل مجاهد
وسنطلب سلماً
سنرجو عفو الأعداء
سنقبل كل الأقدام
وسيفعل كل الشعب
إن رفضوا فسنذبحهم
قربان محبة وسلام
عل الأعداء يتركونا أحياء
فحب العيش داء
ولقد أحببنا العيش
حتى لو متنا جبناء
----------------------------------------------
قانا(كتبت لقانا الأولى ولم تنشر فأبى الصهاينة إلا أن تنشر مع قانا جديدة!!)
أطفال حلوين صغار
راجعين من المدارس
بيلعبوا فرحانين
بدون لا جيش ولا حارس
بينهم ولد صغير جميل وأسمه فارس
شافوا طيارات
شاورولها بالتحية
رموا عليهم حاجات
أفتكروها هدية
أتاريها كانت قنابل
تقتل كل حي
قتلت صوت البلابل
ما فضلش حد حى
فينكم يا عرب؟؟؟؟؟؟؟؟؟؟؟؟
فينكم يا مسلمين؟؟؟؟؟؟؟؟؟؟؟؟؟؟؟؟؟؟؟؟؟؟
لما أمل حياتنا
قتلوه المجرمين؟؟؟؟؟؟؟؟؟؟؟
-----------------------------------------
القمة العربية(عبادة الشيطان)
فلنرقص رقصة يا ويكا
ولنعبد ربنا أمريكا
لا غير كلينتون يحمينا
نعجات نحن ونتنياهو راعينا
لا نرجو غير كراسينا
ونرقص رقصة
ويضيع الأقصى
ولنجلس حول الطاولات
ونطنطن بعض الكلمات
ولنشجب بعض الشجبات
ونعود لنرقص رقصة
حول رفات الأقصى
ولنحمد ربنا أمريكا
لبقاء الكرسى يا ويكا
-------------------------
الله أكبر
الله أكبر كل وقت وكل أوان
الله أكبر ياللى بتعبد الامريكان
الله أكبر باقولها ولو تودينى الليمان
الله أكبر تقولها الدنيا جيل ورا جيل
الله أكبر ياللى بتسجد لأسرائيل
الله أكبر كل وقت وكل أوان
ها تعرفها معناها
بعد ما يفوت الأوان
------------------
رد يا خنزير
يا معيش شعبك ع الأوهام
بعتنا لليهود بكام
وأزاى بعد جرايمك ف حق العوام
بتعرف يا عديم الدين تنام
صدق اللى قال خنزير
وما فيش منك كتير
عشان كدة أسيادك حابينك
ورغم جرايمك سايبينك
يا خنزير يا أبن الكلب
خليت كرامتنا مطية
لكل من هب ودب
أرحل عنا وكفاية
دة الظلم له نهاية
أصل أكتر م اللى عملته
هاتعمل فينا أيه
ده شارون لو كان رئيسنا
كنا صعبنا عليه
أقول أيه
خنزير
وما فيش منك كتير
وأحنا اللى نستاهل
لأننا شعب حمير
----------------------------
مبايعة
بنبايعك للأبد
وهانعملك تمثال من بكرة يتعبد
خليت حياتنا نور
ما هو انت شمسنا
ونمشى وراك بالبخور
يا ساكن قلبنا
نتحدى الدنيا بيك يا حمانا ودرعنا
منعتنا الكلام
عشان مالوهش فايدة
حرمتنا الابتسام
البسمة دى حاجة زايدة
ياللى قلوبنا ف أيدك
وفلوسنا ف أيدك
ومهما عملت فينا هانفضل عبيدك
ونبايعك للأبد
وهانعملك تمثال من بكرة يتعبد
ياللى حياتنا بعدك مالهاش أى لازمة
والشعب من بعدك ما يسوى نعل جزمة
-----------------------
محو الهوية
إعلان كبير مكتوب
على ناصية حوارينا
حكومتنا الرشيدة
هاتغير أسامينا
محمد يبقى مارسيلو
وفاطمة هاتبقى جورجينا
قرينا الأعلان ومشينا
وضحكنا بعد ما بكينا
بعد الأسم أيه فاضل
من ذكرى أهالينا
ده مهما عملتى يا حكومة
مش هانغير أسامينا
وهانحافظ على الذكرى
مهما كبرنا وعلينا
ده الأسم هو هويتنا
وعنوانا
لو تهنا يوم عن بيتنا
------------------------
تغيير وزارى
قال عايزين تغيير
آه يا شعب حمير
كل واحد فيكم عامل نفسه خبير
قاعدين تشيلوا وزير
وتحطو مكانه وزير
وتقولو ده أصله حرامى
وده نصاب كبير
ماهو لو مكانش حرامى مكانش يبقى وزير
وأحيانا أحتاج حلنجى ونصاب فعلا كبير
حطوهم ف السجون
وبلاش كلام كتير
ده انا مهما عملت فيهم هايفضلو برضه
حمير
-------------------------------------------
مملكة الجمالية
زغرتى يا ولية انتى وهية
بلدنا الحلوة المحمية
هاتبقى مملكة الجمالية
حاكم الست حسنية
بنت الحاجة مبروكة
هاتعين بنتها جمالات
ف تمثيلية محبوكة
هاتقولى دستور
شى لله يا دستور
ما تخللى الطابق مستور
وبلاش يزن ع خراب عشه الدبور
بعد يا ولية يا ام مخ مهلبية
ما كنتى بتدعى بالموت على حسنية
هاتجيلك جمالات المفترية
بعد كدة قولى الحمد لله ع الغلا
وتتحملى مهما زاد البلا
واهو اللى تعرفيه
أحسن م اللى ما تعرفيهوش
وحسنية مهما كان
بقالها معانا زمان
أما جمالات فشكلها مالهاش أمان
مشيالى مشدودة ومنشية
وعاملة هانم بنت حسنية
الله يرحم جدودها اللى ماتو حافيين
والا نسيت تاريخها
عشان امها ناهبة الملايين
-------------------------------------------------
آخر حلاوة
بقى مش عاجبكو جمال
مع انه آخر جمال
وصدق الريس متقال
طل ع الحلاوة
ما هو حلو وشيك ونقاوة
والفراولة بتاع الفراولة
ماهو ابنى جيمى بالدولة أولى
واهو العيلة تاخدكو مقاولة
طب اجيب غيره مين
قولولى يا ناصحين
اصل انتم شعب نمرود
شوية كلاب وقرود
وبرضه هاعينه
يا شعب زى الجزمة
لأنكو شعب واطى ف الدنيا مالكش لازمة
وهاوصيه من اول يوم
ماتشوف عنيكو راحة ولا نوم
ده أنا اللى نورتكو
وقلت ي ديمقراطية
هاتيجو ف الآخر
تقلبوها عليا
هأأو أو أو
ورقصنى ي عنيا
طل ع الحلاوة حلاوة
طاقة نووية يا ست نبوية
جمالاتى نجاد
هايفرح العباد
ويزيدهم كهربا
آل ايه طاقة نووية
ناس مش لاقية رغيف العيش
على رأى الست نبوية
قام يتفلحص قال ويقولك
طاقة نووية
طب لما ينضف كوز المية
ونقدر نشرب م الحنفية
من غير ما تجيلنا الامراض
ولا تتعبنى كتير كلاوية
ولما يرخص سعر البيضة
دى الواحدة بجنيه يا حرامية
فكرونى بحاجة جميلة اسمها حكومة اكترونية
قالها واحد دمه خفيف
أقذر م الجزمة أسمه نظيف
قعد يقولك ع التطوير
وأننا شعب ذكى وخطير
ولما يخرج برة بلدنا
يقول عننا شعب حمير
الحق مش عليه
الحق ع الحمير
نرجع مرجوعنا المتقدم
احنا لا نفلح ولا نتقدم
طول ما حاكمنا ولاد حسنية
ومراته القرشانة دى هية
ويقولك آل طاقة نووية
أرقعى زغروتة يا نبوية
ده أحنا خيبتنا متنقية
والبركة ف عيلة حسنية
اكترونية وطاقة نووية
ضحكتونى يا ولاد حسنية
فكرتونى بنفر جعان
وماشى حافى وعريان
بدل ما يستر جسمه بخرقة
وياكل لقمة ولو بالسرقة
جاب كرافتة بيير كاردان
وقالك انا أشيك انسان
من غباوته نسى
انه مازال عريان
بطلى زغاريد يا نبوية
وغطينى
وصوتى عليا
